لا واهنيك يا جبال السراوات
يوم انتي اشهر قمة فالجزيره
يوم ان لك صيت مع الناس ما مات
واسم يلازم كل هقوا كبيره
وهامات مجد يلتفت للسماوات
وجذور تاريخ عريقه وسيره
ورسوم عز ماعليها انهزامات
تثبت وفالصكات تبقى قريره
لو حاربك صلف الهواء كل الاوقات
مازعزعك ويروح مرواح غيره
لك في عيون العابرين اعتبارات
مازالت بعسر الزمان ويسيره
سبحان من سواك للعبره ايات
وارساك لاصحاب العقول البصيره
حتى الغيوم العابره كل ما جات
تنهار لاحضانك بلهفه غزيره
واليا اعترى شمس الغروب انحطامات
تالي نهار قد تواقد سعيره
رفرف على القمه بريق انتصارات
وارسل شموخك للجوايح نذيره
وكن الضباب اللي على متونك شتات
لا هب نسناس الصباح بعبيره
امثال جمع ملوك يوم احتفالات
كفوا المشالح والعبوا بالشطيره
والمعذره بحسدك ياذا المنيفات
واقولها من طيب ذات وسريره
ياليتني مثلك على مر الازمات
مثلك على نفس الوتر والوتيره
مااخشى ضياع الخاتمه فالبدايات
وابدى ولا ارضى في بدايه قصيره
ياليتني ما حسب حساب المسافات
حتى ولو كانت عليه خطيره
ولاا ابتعد عن مرجف الانتقادات
اللي عشانه قمت ادور جبيره
ضيع على تفكيري الاتجاهات
وانا لعين رضاه ما شفت خيره
واليوم منك اسست للجاي وقفات
مادام كلا يعتني في مصيره
ما عاد لهروج القفيا ملفات
عندي .. ولا للي يهدم المسيره
وان قالها الله يا جبال السراوات
اني لا اطاول قمة بي جديره
ليست هناك تعليقات:
إرسال تعليق