دنيا العنا يبغى لها جهد وصدام
حتى تحدد موقعك فالخارطه
درب يجيب رضاك مليان زحام
والناس مثلك فالدروب مرابطه
لو كل شي صار من دون اهتمام
ماصار من بين العباد مغابطه
واليا بغيت ان قسمتك فيها سنام
فاعزم ولا تجعل الاماني هابطه
نطح بها قمة جبل تحت الظلام
واسرج عزوم فالمواقف قالطه
لا تعرض الافكار لعيون الانام
فيزلزلك شخص عزومه ثابطه
وان خلت براق تضاحك في غمام
رح له ولا تبكي فراق القاحطه
ان فدت والا تقفل ابواب الملام
لا يجيلها وسط الضمير مخابطه
دام العلا يبغى لها قلب همام
فاقدم بدون مخاذله ومشارطه
تحتاج نوع من الادب والاحترام
يكسر لك انظار العيون الساخطه
مع دبلماسيه لتقييم المقام
تخرجك من بين السهوم اللاقطه
واحيان تحتاج التسامح والسلام
واحيان يحتاج المقام مهايطه
واحيان تحتاج التأني للتمام
بعض التعجل ينشبك بمغالطه
سدد وقارب في رجى حسن الختام
واصنع نجاحك بجتناب الساقطه
واجعل شعارك مستحيلك للعدام
دام الخلايا بالعزيمه ناشطه
وان كان عندك واسطه هذا الكلام
يكفي عن اللي قلت كله واسطه
