في تمحاص الخوي كل اهتمامي
قبل ما تصبح علاقتنا كليفه
ما اتعلق بالوجيه وبالاسامي
والصدور الضايقه والا الظريفه
لي على الرجال هقوات ومرامي
كان ماهو حولها ماني حليفه
ماهو بمن كبرياء والا تسامي
والتكبر يهدم النفس الشريفه
والله ان الكِبر ماهو في نظامي
بس حرص العاقل ظلاله وريفه
كم تهقوينا بمردوم السنامي
وآثر عزومه على الهقوه ضعيفه
وكم نوردها ومصدرها حيامي
وكم شكى جرح المراجل من نزيفه
كل يوم والمواقف في تنامي
تظهر اللي من كسيفه في كسيفه
واحداً لا شاف في الدرب ازدحامي
شاف له مخرج ولا رده رصيفه
ينثني عن سومته والسوق حامي
مايهاب لشرهة حشوداً محيفه
وواحداً ياقرب وصفه للحرامي
المصالح تبعثه وتجيب طيفه
وان وصل ما في ضميره من مرامي
غير الوجهه ولا شيف إِلْه شِيفه
وواحداً متخصص بنقل الكلامي
كن ماله من سوى النّمْه وظيفه
يجتهد ويسير في ليل ظلامي
وان نصيته حضّر بمحضرك جيفه
وواحداً عند الملازيم انهزامي
ما يشير بكلمة ترقى المنيفه
من ضعافة نفس مدري من تعامي
المهم ان أجبر عظامه رهيفه
وواحداً يفزع مع الصف الامامي
غير عيبه يلحق الفزعه حذيفه
منّتَه في فزعته مسك الختامي
جعلت دروبه على الفزعه قصيفه
وواحداً متملق لك وإِخْتِدَامي
مابَرد حيله على كثرة رجيفه
في بحور الكذب والتزوير طامي
كل قولاً منه ما اجادل بزيفه
هاذي الانواع ماهي من مقامي
يوم كل يعتزي في حد سيفه
لي من الاجواد من يجبر عظامي
روس قوماَ فعلهم خِيَّل رفيفه
كل رجلاّ منهم حساماّ عصامي
ويِعَدل فعله من العالم نصيفه
في مقر الشيمه بمنصب محامي
مايجيب الهون والا يستضيفه
لو نخيته ثار ما يرضى الملامي
كنه الا لازمه والشان كيفه
صاملاَ صنديد زيزوماَ قطامي
والحمول الكايده عنده خفيفه
لو يحط كتاب بافعال الكرامي
مثله وشرواه في صدر الصحيفه
له على مر الدهر كل احترامي
حالف اني ما اجهله واقبل رديفه
والثناء لله دام الحظ سامي
يوم ميزت الدهر برده وصيفه
بعدها عاهدت نفسي بالتزامي
بالدروب اللي من الشبهه نظيفه
واشكر الله كل خُوياي وحزامي
من رجال طيبهم مامنه خيفه
ليست هناك تعليقات:
إرسال تعليق