معنى القصيد ومنطقه ورسامه
سيف يجمل ناقله بحزامه
سيف يسمى به حضور الشاعر
لا جرده في لازمه وصدامه
والشاعر اللي مايجمل ربعه
ويجنبونه لابته وارحامه
ماله وجود وان حضر فوجوده
ما يشبه الا غيبته واعدامه
وانا مع ربعي وفي لازمهم
كني وشعري عمرو والصمصامه
سيف شهر بين العرب صيت له
بيمين منهو يحسن استخدامه
ومادامني والشعر عمرو و سيفه
حق علي مارضى بثلم حسامه
واهديه للي يعرفون امجاده
قحطان روس المجد واسم وقامه
في صفحة امجاد الشرف واقعهم
مثبت وكل يعرفه وارقامه
هل سله ودله واهل جاهيه
ورسوم ناموس ترف اعلامه
للطيب وجه وللكرامه قبله
والصمله اوضح من جبال تهامه
واللي لفاهم ضيف يلقى قدره
يلقى تراحيب تزم الهامه
جود على مذهب وفعل غالي
متوارث من مصدره وإلهامه
زبن الدخيل اهل الذرى والمنعه
هل هيبة تردع بها الخصامه
من يستجير بهم بعد جار الله
من بعد ربي ينزحون اوهامه
ويوم الجهل والحرب يطحن ضرسه
من ضدهم راحت به الدوامه
ذولا قحطان المجد ما عداهم
وتاريخهم ماهي تجف اقلامه
في كل يوم للمراجل مبدى
وافاعلهم ما تجهل السوامه
وسيف بن عايض خوته معروفه
كفوا يجمل لابته واعمامه
وافي كريم يمين يسلم راسه
يصرف على كسب الجميل ايامه
يحفظ حقوق الخوه ولازمها
نادر بعصر العالم الهدامه
ومن لا يخاوي واحد قحطاني
شروى ابن عايض ضيعته احلامه
واللي يبي الشاهد فينشد صالح
يشهد على مدحي وصدق احكامه
وانا هنا باسمه وباسم ال صالح
واسم المقام الحاتمي وكرامه
واسم الشيوخ ولابتي وحزامي
قيف يجملني وانا قدامه
يامرحبا ترحيبة مثنيه
ترحيب جود ما وراه ليامه
ترحيب اغلى واطيب من العوده
واصدق من البراق بين ركامه
يامرحبا ياضيفنا وقدومك
شرف صبح واضفى عليه وسامه
شرف بلاد بالكرم معرفه
ورجال عز بالشرف قوامه
صبيان ابن لمعان صيت لامع
للضيف ريف وللعدو لطامه
تاريخنا حافل بكل مجمل
وافعالنا مافي ذراها اتهامه
قلته واذا قصر قصيدي عذرا
والعذر عند اهل القصيد إلزامه
فالاوله ما اوفى القصيد الغايه
وانتوا اعز من الشعر وانغامه
ناموسكم وافعالكم وشيمكم
ما يحتويها شاعر بافلامه
والثانيه فالشعر منكم ينهل
وانتوا هله واربابه وحكامه
منكم جزيل الشعر يروى عده
توخذ قواعد حكمته ونظامه
وختامها اصلي على اشرف خلقه
بازكى السلام وبالغه واتمامه