ياسحاب الشعر هل امطارك الوسميه
المشاعر مجدبه واحساسها عطشاني
والفيافي من هجير شحوحك الحتميه
تلتهب شوق وتعطش فيضك الوداني
من سنه ماشفت براق القصيد وضيه
من سنه ما حن رعاده على وجداني
من سنه والعين فيها للسهر ماريه
ماهي بمارية حروفي ولا قيفاني
غير لا جت دعوة الاجواد مالي نيه
اتعذر عن مقام يرجح الميزاني
محفل عند الدواسر مكسب وياحيه
والله اني ما اتبدل فيه حفل ثاني
باتعنى له وبحضر والمشاعر حيه
تشتعل من طيب منصاها وطيب العاني
ياسلام الله سلام يشرح النفسيه
ينفلق مثل الصباح الشارح البياني
ياسلامي ياهل تاريخ فرق ماضيه
بالمراجل والمكارم سطر العنواني
ياهل الفزعات واهل الوقفه المسميه
ياذرى الساري وعونه فرحة المتواني
تامن بوسم الدواسر فالعصا الطرقيه
وسمهم يكسر عزوم المعتدي والجاني
والكرم باسم الدواسر حجة منهيه
للكرم مايحسبون المال خطل ايماني
عزوة ماتنقصر خياله ورجليه
عزوة توفي مطالبها ولا تنهاني
والحقيقه نور شمس ماهي بمخفيه
والتجارب للعقول الراشده برهاني
والله ان اللي قضى عمره بلا جاهيه
عاش ماله خوة مع دوسري صنياني
دوسري يرفع عزومه في نهار الهيه
خلد اسمه بالمراجل لو رميمه فاني
والمصارير الزحول متعبين العيه
نارهم ماتنطفي للضيف والعدواني
نارهم ترسم على وجه المعادي كيه
وتعزم ضيف يدور للكرام اوطاني
جود كف وطيب روس ماهي بعاديه
اصدق من الفجر في وجه الظلام الداني
كن مجالسهم وزارات من الورديه
وكن ضيافتهم ضيافة حاكم سلطاني
الغلاء والجود والترحيبه المثنيه
والدلال تفوح نشعة بنها الخولاني
والشحم مسك الختام ومطلع العزميه
وافي ماجوبهم ماحولهم نقصاني
وال جعشان الكرام ومقصد العانيه
يوم اجيهم شانهم ما كنه الا شاني
قلتها مالي وراها حاجة مرجيه
قلتها من دافع التقدير بين اخواني
ليست هناك تعليقات:
إرسال تعليق