وقفة الرجال قدام المنابر
لازم تجمل قبيل من قبيله
والحروف اللي نظمها فكر شاعر
ماهي بقله ولاهي مستحيله
لانها في روس صبيان الجحادر
عون من بقعاء على ايامه وكيله
ياسلامي عد همال وماطر
يروي الديره ويبهجها مخيله
ياسلامي ياهل تاريخ وحاضر
يشرح الخاطر ويعدل كل ميله
ياهل السيف المحنى فالمناحر
واهل الوقفات بايام مهيله
روس قوم ما يهابون المخاطر
من سلايل لابة ترقى الطويله
قيف قحطان العرب والاسم ظاهر
يشهد الماضي لها والشك ازيله
والجحادر صيتهم ماهو بعابر
يثبت التاريخ له ويشد حيله
وابلهم بامان في كل المناشر
ماسلب منهم قعود في مسيله
واحتموها بالمهند المعابر
والرجال اللي على قب الاصيله
مثل ابن بتراء وذاك الاسم شاهر
ابن بتراء محمد حزام القبيله
فارس في وقفة الحراب ماهر
راعي الهيه و قداح الفتيله
وارث رجال على الناموس تامر
كنها عن مصدر الشيمه كفيله
مثل كساب الثنا وسط المحاضر
يا سوندي وانت ما تبغى دليله
وجهك ابيض وانت بالهقوات تاجر
في رصيدك كل ناموس تضيله
منزلك بالضيف والخطار عامر
بيت كفو ما حد يجهل سبيله
وان لفتني دعوة الاجواد حاضر
مامعي في دعوة اخواني بديله
محفل حويزي وعبدالله مباشر
وانتشرف به ولا بد نعني له
الكرم والجود من طيب المصادر
المقام الحاتمي من سلسبيله
في رضاكم ما حسبنا للمحاذر
ما حسبنا الدرب كيلوه وميله
يارجال الطيب ورجال النوادر
يانجوم سهيل والجدي الدليله
حفلكم حفل لنا والحفل زاهر
بالشيوخ اللي لفوه ومن يجي له
تمت الافراح بجهود تظافر
واحتفلا يبهج الخاطر مثيله
والختام المعذره والعذر عاذر
والمسافر يقصر ان عزم رحيله
وان قصرنا الشعر في ظرف المسافر
ماقصرنا قدركم ياهل الجميله
ليست هناك تعليقات:
إرسال تعليق