ياللي بيدك الجود والرزق و الزود
الحمد لك يالله ومنك المثوبه
فضلك علي اكبر من النايف الطود
واوسع علي من الفجوج الرحوبه
ما للوهايب من كرم فضلك حدود
بيدك مقاسيم العباد محسوبه
ولا احدا سواك بمدة الجود محمود
انت اللذي سقنا ثناء الحمد صوبه
يارب تعطيني على الشكر مجهود
ياللي بحكمك يلبس العمر ثوبه
سميت باسمك فاتحة عابر الفود
وابك اتوكل مبتدى كل نوبه
سميت والاسماء على اصحابها شهود
سميت صقر وما على الصقر شوبه
اسم مع الهيبه مقدم وموجود
اسم ينومس من تذرى جنوبه
يطلق على اللي بين الاجواد معدود
واللي على كسب المراجل شبوبه
واللي يميز بيض الافعال والسود
واللي يداري سمعته من عيوبه
رمز الكريم مخضب الكف بالجود
رمز الشجاع واللي تحدى الصعوبه
رمز الفطين المنتبه لارهف النود
اللي على فهم الهدف مثلوا به
له مع علوم المجد ميثاق وعهود
يضرب به امثال الشرف من دروا به
والجاهل اللي عذرب الاسم مردود
مادام يجهل مشرقه من غروبه
يكفي عن التبرير في كل مقصود
قولا برق دون الثريا نصوبه
ياعاذلي لو كان فالصقر منقود
ما عرف ابو متعب بصقر العروبه
ليست هناك تعليقات:
إرسال تعليق